ИЗГЕ ТЕЛӘКЛӘР

Авызыңа бал да май, артыңа колын тай.

Авызыңа баллы җау.

Авызыңа каз мае.

Авыр туфрагы җиңел булсын.

Авырлыгым шунда калсын.

Авырлыкка - җиңеллек.

Аз булса да, күп итеп ал.

Ай йөре дә сау йөре.

Ай рәхмәт төшкере, кулыңа гөлләр үскере.

Айга - айлык, миңа - саулык.

Акылыңнан куан.

Алгы итәгеңне бала бассын, арткы итәгеңне мал бассын.

Алды-арты хәерле булсын.

Алла әҗерен бирсен.

Алла куәт бирсен, җаныңа саулык бирсен.

Алла рәхмәтеңдә булсын.

Алла сакласын, кара елан чакмасын.

Алла ярдәм бирсен.

Алладан кайтсын.

Алланың бар иткере.

Армый эшләгез! - Сары май тешләгез!

Арты килүле булсын!

Ару үлем, ак кәфен!

Аруга тару бул!

Атын мин куштым, яшен Алла бирсен.

Ахыры хәерле булсын.

Аш булсын.

Ашың-чәең тәмле булсын.

Аягың җиңел булсын.

Аяк-кулың сызлаусыз булсын, күңелең сырхаусыз булсын.

Аяклары төкле булсын.

Әй уңгыры, бер башың мең булгыры.

Әйткәнең фәрештәнең «амин» дигәненә туры килсен.

Әрвахлар рухы шат булсын.

Бай, бәхетле бул.

Бай булгыры!

Балдан рәхим итегез, майдан авыз итегез, дөньяда балдай татлы, майдай тук булып гомер итегез.

Башыңа дәүләт яусын.

Бәйрәм мөбарәк булсын, мәҗлес түгәрәк булсын!

Бәйрәмнәр котлы булсын, тормышлар хутлы булсын.

Бер кулың - майда, бер кулың балда булсын.

Бер урынына ун булсын, эшләрең гел уң булсын.

Бәла-казаларыннан сакласын.

Бәрәкәт яусын.

Бәхете аягына чолганса иде.

Бәхетенә тәүфыйгы булсын.

Бәхетең алдыңа сайрап кунсын.

Бәхетең яр булсын.

Бездән кайтмаса, Ходайдан кайтсын.

Гаип хәзинәләреннән бирсен.

Гомерләре озын булсын, бала-чагалары мул булсын, абзар тулы мал, авызлары май да бал булсын.

Гомереңә бәрәкәт бирсен.

Гүрең якты булсын.

Гыйшыклары кайнар булсын, гомерләре матур узсын.

Дәүләт кошы башыңа кунсын.

Дәүләт өстенә дәүләт яусын.

Дәүләтең артсын.

Дәүләтең белән картай.

Дәүләтең ташсын, башыңнан ашсын, михнәтең качсын.

Дөньяларың тигез булсын, балаларың игез булсын.

Елларга иминлек бирсен.

Җылы тәнеңдә тузсын.

Игелек күр!

Игенгә бәрәкәт, җанга саулык.

Игенегез уңсае, минем буе булсае.

Изге җаннардан булсын.

Изге сәгатьтә!

Ил ашасын, йөз яшәсен.

Исән йөреп, сау кайт.

Исәнлеккә-саулыкка, тазалыкка-байлыкка.

Йөз яшә, йөзем аша.

Йөзең ак булсын.

Йөргән аягың савапка бетсен.

Йөргәнеңдә юлың уң булсын, Хозыр ата юлдашың булсын.

Картлыкта рәхәтлеген бирсен.

Керер юлларын киң итсен.

Киемең   тузсын,   үзең үс;   киемең - чүплек   башына, үзең - кияү куенына.

Кимәгәнне киеп булыр, кигәне өстеңнән төшмәсен.

Килен килбәтле булсын, сүзе ширбәтле булсын.

Кияве - сиңа, бүләге - миңа.

Котлы аягың белән!

Котлы булсын!

Кул артың җиңел булсын.

Кулың-аягың сызлаусыз булсын.

Кулыңнан кинән.

Күргәнгә күркәм сабырлык бирсен, күрмәгәнгә күрсәтмәсен.

Малыма килсә килсен, башыма килмәсен.

Малыңның игелеген күр.

Маңгаең йолдызлы булсын, бүркең кондызлы булсын.

Мәзәгегез түгәрәк булсын.

Мине сөендергән өчен Ходай сине сөендерсен.

Морадыңа иреш!

Мөбарәк булсын!

Насыйп кылсын!

Нахагыннан, хагыннан Ходай сакласын.

Өйләнүең уң булсын, башы-ахыры шул булсын.

Өстәүле мал булсын.

Өстеңдә тузсын.

Рәхмәт төшкере, дәүләт иңгере.

Рәхмәт яугыры!

Сигез оҗмахның ишеге сиңа ачык булсын, теләгән оҗмахыңа кер.

Сиңа Ходай өмет итмәгән җирдән бирсен.

Сиңа - юл котлыгы, миңа - өй котлыгы.

Соң булса да уң булсын.

Суы сарыксын, үзе калыксын.

Тагы йөз ел тор.

Тамгаң ай булсын, нәселең бай булсын.

Тансыгына кансын.

Тапканың таш булсын, тамагыңа аш булсын.

Ташка ябышсаң көмеш булсын, туфракка ябышсаң алтын булсын.

Тәңре ярдәм итсен.

Тел төбеңә сары май.

Тигез гомер итегез.

Тиңе белән булсын.

Төкле аягың белән.

Туйлар мөбарәк булсын, яшьләр бантына бәхет кунсын, өйләре бала белән тулсын.

Туйлары котлы булсын, нигезләре ныклы булсын.

Түбәсенә туклык, тамырына ныклык.

Түшәге-ястыгы йомшак булсын, кич ятканда кабарып торсын.

Тыныч йокы, татлы төш!

Узгынчы авыру булсын.

Улыңның, кызыңның игелеген күр.

Урыны җәннәттә булсын.

Утның күңеле көр булсын.

Фәрештә колагына төш булсын.

Фәрештәнең «амин» дигән сәгатенә туры килсен.

Хәере белән булсын.

Хәерле бәрәкәт бирсен.

Хәерле каза булсын, калганы таза булсын.

Хәерле сәгатьтә!

Хәерле сәфәрләр бирсен.

Хәерле төн!

Хәерле юл!

Хәтерең бар булсын.

Ходай ак тормышлар бирсен.

Ходай сиңа җиде оҗмахның түрен бирсен.

Ходай тел ачкычлары бирсен.

Ходай язмасын! - Язса да бозсын.

Эшкә уңлык! - Җаныңа саулык.

Эшләрегез уң булсын. - Уңышлар бергә-бергә булсын.

Юлларыңа ак җәймә.

Юлы ак, гомере озын булсын.

Юлың ак сөттәй булсын.

Юньле-юсыклы кеше булсын.

Яткан җирең мамык булсын.

ЯМАН ТЕЛӘКЛӘР

Авызың белән әйт, борының белән тарт.

Авызыңа таш   тыгылсын.

Авызыңнан җил алсын, илтеп куеныңа салсын.

Актык көнең булгыры.

Алганың әчеңне тишеп чыксын.

Алдаганның анасы үлсен.

Алла каберен якын итмәсен.

Алла кашында тоткын булсын.

Алланың каты каһәре суккыры.

Алланың каһәре төшсен.

Алланың ләгънәтләре яусын.

Алтмыш өйле Көтернәс алты өйгә калса иде.

Антың башыңа җитсен.

Арпаң-көрпәң аш булсын, тамагыңа таш булсын.

Атавыңа чыксын.

Атаңа ләгънәт - авызыңа таш.

Аты коргыры.

Ахирәттә алдыңда булсын.

Ахирәттә ике кулым якаңда булсын.

Ач-ялангач йөрмә, ир рәхәте күрмә.

Ашаганың аш булсын, тамагыңа таш булсын.

Ашаткан ашларым, иткән яхшылыкларым тотсын.

Аягыңны бәддога сугып, ике тубыгың тиң корышсын.

Әфсен-төфсен, башың бетсен.

Башы түбән дөмеккере.

Башы йөзтүбән килгере.

Бәддога төшкере.

Бәхетеңне йотсаң иде.

Безне бутаганның эче-бавыры буталсын.

Берең ике булмасын, йортың-караң калмасын.

Бирәне сапкыры.

Бугазы ертылгыры.

Бугазына аркылы килсен.

Бугазына пычак кергере.

Бугазыңа таш булып утырсын.

Гомерең кыска булгыры.

Гүрдән гүргә сикерсен.

Гүрендә дуңгызы үкерсен.

Дөмегеп кат.

Дөнья йөзе хәрам булсын.

Зәхмәт кагылгыры.

Җаның җәһәннәмгә олаккыры.

Җәзасын тартсын.

Җен алгыры.

Җир тотсын аны.

Җирдә кортларга азык булып яткыры.

Җиттем дигәч җимерел, куандым дигәч куырыл.

Җылы авызыңнан җылы куеныңа.

Җылы тамагыңа кара таш.

Игелек йөзен күрмә.

Ике күзе тиң чыксын.

Ике күзең чәчрәп чыксын.

Йөзе аска килгере.

Йөзең йөзтүбән килсен.

Йөзең кара булгыры.

Кадалып киткере.

Каргышың карга башына.

Каргышыңа - каргышым.

Каһәр суккыры.

Котырган этләр ялагыры.

Кулы корышсын.

Кулы череп аккыры.

Кулың авызыңа җитми утыргыры.

Кырык чөе кырылып бетсен.

Күз яшем тотсын.

Күзе тишелеп чыккыры.

Күзең күмер булсын.

Күмәч төсен күрмәгәре.

Күргәнең-күрмәгәнең шул булсын.

Күрми күмер булсын.

Ләгънәт кенә сукса иде.

Миең чергере.

Миннән алсын, сиңа бирсен.

Муеннары сынгыры.

Муеның астына килеп, кәкрәеп катсаң иде.

Мур кыргыры.

Нәләт төшкере.

Өмете кисел гере.

Өне тыгылгыры.

Пычак кергере.

Сәгатьлек әҗәл тигере.

Такта чәй орсын.

Тамагыңа сөяк булып кадалсын.

Тамагыңа таш кергере.

Тамагыңа тимрәү калкып, телеңә төер чыккыры.

Тартышып ят.

Тары кебек чәчелеп кит.

Тәгәрәп җан биргере.

Тәгәрәп үчкере.

Телең корышып, өзелеп төшкере.

Телең чергере.

Телеңә тилчә төшсен.

Телеңә чуан чыккыры.

Тиреңне курага җәйсеннәр.

Токымың коргыры.

Тораташ булып катсын.

Урты шартлагыры.

Урынын җиде кат җәһәннәмдә кылсын.

Утырыр җиреңне ут алсын.

Уты-суы бер көн булсын.

Үз кадагыңа кадал.

Үз каргышың үзеңә.

Үзе дә бала күрмәсен.

Үләт ялагыры.

Хатын казасын күр.

Чыңрак үтә кит.

Чәнчелеп киткере.

Шайтан алсын.

Шайтаныма олаксын.

Эчең чыккыры.

Эчеңә бирән ояласын.

Эчеңә пычак кергере.

Эчеңә таш булып утырсын.

Эчеңне тырнасын.

Ялгызлыкта җаның чыксын.

Яшен бирсә дә, көнен бирмәсен.

Яшем төшсен.

Яшь башыңа куанма.

Яшьлеген яшен суксын.

 

АНТЛАР

Айдыр әгәр.

Анамның имезгән сөте хәрам булсын. Ант орсын.

Әби-бабаңа, ата-анаңа, җиде буын балаңа зыян салсам, кулым корысын.

Баскан җиремнән китәлмим.

Валлаһи газим.

Дөньядан сәгатьсез китим.

Дөньялардан имансызлар үтим.

Җаным кабыргама килсен.

Ике иңем, бер түбәм.

Ике күзем кояшны күрмәсен.

Ике күзем чәчрәп чыксын.

Икмәгем орсын.

Икмәк өстендә әйтәм.

Икмәк чыраен күрмим.

Икмәкнең бөртеген күрергә мохтаҗ булыйм.

Икмәктер газим.

Иманым көфер китсен.

Иманымнан җөда булыйм.

Ипи йөзен күрмәскә риза.

Ипи орып үтерсен.

Кадалыплар китим.

Кара тәүбә, ак тәүбә.

Кашык каным калганга кадәр.

Коръән алып ант итәм.

Коръән орсын.

Кояш йөзен күрмим.

Кулымны кисәргә бирәм.

Күзләрем маңгаемда булмасын.

Кызарып чыккан кояштыр.

Менә ак сакалым.

Менә табын өстендә әйтәм.

Менә тырнак очым.

Сары май тамагыма торсын.

Сыртым көйсен.

Тамагыма таш булып кадалсын.

Телем корысын.

Тораташ булып катыйм.

Төкер битемә, сүзем чын булмаса.

Утырган урынымнан тормыйм.

Чукынып китим.

Шартлап китим.

Шатлык йөзен күрмим.

Шушы урында җир упсын.

Шушы якты дөньяны күзем күрмәсен.